«Gschichte vo hie und hütt» mit Pedro Lenz «Eine vo früecher»

Pedro Lenz, 52, Mundart-Schriftsteller und Publizist, schreibt in seiner Kolumne für die «Schweizer Illustrierte» über den Wert von Begegnungen in der realen Welt.

I ha nen aute Maa gkennt, wo jede Morge i ds Dorf isch. Wenn er e Rächnig het müesse zahle, isch er zersch uf d Bank go Gäud abhebe. De het er am Bankschauter gseit: «Grüessech, Frou Bärtschi. Wi geits? Wi geits de Ching? Wi geits am Maa?»

De het di Frou vom Bankschauter chli verzöut. Nächär het si nim ds Gäud useggä. De isch er übere zur Poscht. «Grüessech, Herr Hugetobler. Was mache d Chüngle? Was sägeter zu YB?» De het nim dä vor Poscht chli verzöut. Nächär het der aut Maa sini Rächnige zauht.

Gäge Mittag het der aut Maa mindischtens vier oder föif Begägnige gha

De isch er go Brot choufe: «Grüessech, Frou Hofer. Mir es Pfünderli Ruuch. Säget e Gruess deheime.» – «Merci, i wotts gärn usrichte.» Nächär isch er es Kafi go nä. De het er auben eine troffe, wo früecher mit nim gschaffet het. Nächär hei di beide chli über ihri Bräschteli gredt. Der eint hets mit de Chnöi gha, der anger im Rügge.

Und wenn der aut Maa gäge Mittag hei isch, de het er mindischtens vier oder föif Begägnige gha, het er auso mit mindischtens vier oder föif Mitmönschen e zwüschemönschlechen Ustuusch gha.

Der aut Maa hätt natürlech siner Iizahlige ou elektronisch chönne mache. Ds Brot hätt er am nen Ort chönne choufe, wo me sini Ware säuber iiscannet. Ds Kafi hätt er ou vor eigete Kafimaschine chönnen useloh. Und zum wüsse, wis de Ching vor Frou vom Poschtschauter geit, hätt er wahrschiinlech uf Facebook chönne go luege, was die grad poustet hei.

Wenn de scho nümm räntiersch, de wosch doch wenigschtens chli Fröid ha am Läbe

Der aut Maa het nid hinger em Mond gläbt. Är het ds Internet und dä ganz Social-Media-Firlifanz beschtens gkennt. Är het gwüsst, was eBanking isch und wies funktioniert. Aber är isch a dene persönleche Begägnige ghanget. Ihm hets guet to, uf d Bank und uf d Poscht und i d Bäckerei z go.

Säubschtverständlech het der aut Maa ou gwüsst, dass er es Usloufmodäu isch und dass es für d Poscht nid räntiert, wenn eine no ds Personau nach em Befinde frogt. «Klar räntiert das nid!», het er aube gseit. «Ig säuber räntieren ou scho lang nümm. Aber was wotsch? Wenn de scho nümm räntiersch, de wosch doch wenigschtens chli Fröid ha am Läbe.»

Är würd immer no lieber go poschten aus go pouste

Ungerdessen isch dä aut Maa scho lang gschtorbe. D Poschtfiliale, won er auben isch go Gäud abhebe, gits nümm. D Bäckerei gits ou nümm. Aber i bi sicher, wenn er no würd läbe, wüsst er scho, wo dass er no chli chönnt go rede mit de Lüt, unabhängig dervo, obs räntiert oder nid. 

Är würd im Migros so lang a ne bedienti Kasse stoh, wis überhoupt no bedienti Kasse git. Är würd immer no lieber go poschten aus go pouste. I weiss das aues, wöu i dä aut Maa guet gkennt ha. Är isch mi Vatter gsi.

Im Dossier: Weitere Kolumnen von Pedro Lenz

Auch interessant