Pedro Lenz' «Gschichte vo hie und hütt» Frouefäud isch Mueterfäud

Pedro Lenz, 53, Schriftsteller und Publizist, sinniert in seiner Mundart-Kolumne für die «Schweizer Illustrierte» über Mutter-Sorgen, wenn Söhne im Festival-Pflotsch toben.

Am Tag het e Frou im Zug e Gratiszitig gläse. Es sig scho verruckt, het si zu ihrere Begleitere gseit, jetz heige di a däm Open Air z Frouefäud e söttige Pflotsch, dass d Bsuecher ihri Schueh i Plastiggseck müessi verpacke. «Wie verpacke?», het di angeri Frou gfrogt! De het di einti Frou ar angere Frou es Büud zeigt, wo me druff het gseh, wi jungi Mönsche mit de Schueh i Plastiggseck inestiige und di Plastiggseck oben ar Wade zue-chläbe, dass ke Wasser inechunnt.

Das isch e typischi Gaga-Mäudig, han i für mi ddänkt. I angerne Gägende vor Wäut passiere Sache, wo würklech exischtenziell si, wos um Läben und Tod geit, wo me müesst drüber prichte. Aber nei, d Zitige bringe lieber e Bricht über nes paar Open-Air-Bsuecher, wo z Frouefäud hinge wägem Pflotsch dräckigi Schueh überchöme. Open Air und Pflotsch, das bringe si doch afe jede Summer bis zum Abwinke. Das interessiert doch scho lang niemer meh! Das het jetz öppe de jede begriffe, dass es pflotschig wird, wenn bi Rägewätter vüu Lüt uf ere Matten umeloufe. Söttigi Gedanke han i gha, überhäblechi Gedanke, Gedanke, wo vou si vo dere Arroganz, wo dä het, wo meint, was für ihn klar sig, müess für aui angeren ou klar si. 

Eis paar Schueh längi sicher

Eini vo dene Froue het nämlech zur angere gseit: «Jesses Gott! Isch das z Frouefäud! Jesses nei! Vo wenn isch das? Vo geschter? Jesses, jesses, de isch es hütt sicher gäng no pflotschig!» De het si ar angere Frou erklärt, dä Morge heig se ihre Sohn gfrogt, obs ächt längi, wenn er für a ds Open Air uf Frouefäud eis Paar Schueh mitnähm. Und si heig nim gseit, eis Paar längi sicher. Jetz göng dä Bueb a ds Open Air mit eim einzige Paar Schueh. Das längi doch nid, bim ne söttige Pflotsch!

Ob de dä Sohn scho ungerwägs sig, het die Frou mit der Zitig di angeri gfrogt. Die het uf d Uhr gluegt und gseit: «Nei, är sött no deheime si, i ha nim sis Zmorge parat gmacht, wahrschiinlech isch er jetz no am Zmorge!» «De schrib nim doch es Whats-App!», het si gseit. Das sig e super Idee, het jetz di Mueter gfungen, und de het si dä Bricht ir Gratiszitig fotografiert und di Fotti zäme mit em Rotschlag, är söu no Resärveschueh mitnäh, ihrem Sohn gschickt.

Gummistifu, Wanderschueh und Turnschueh

Es isch nid lang ggange, het sech der Sohn bi sire Mueter bedankt. Är heig jetz Gummistifu, Wanderschueh und Turnschueh iipackt, heig er gschribe, het di Frou ar angere Frou gseit. Jetz sig si würklech erliechteret. Är wärdi drum so schnäu chrank, wenn er nassi Füess überchöm, und vo däm här gseh sigs super, dass si ne no grad heig chönne warne.

I bi dörte ghocket, ha chli di Mueter gstudiert und ha a dä Sohn ddänkt, wo dank dere Mueter und dank der moderne Kommunikationstechnik kener nasse Füess het übercho und nid chrank het muesse wärde. Är het ds Open Air vo Frouefäud wahrschiinlech chönne gniesse. Für ihn isch Frouefäud vo jetz aa Mueterfäud.

Mehr Kolumnen von Pedro Lenz finden Sie hier.

Auch interessant