«Gschichte vo hie und hütt» mit Pedro Lenz «Über Städt und Musig»

Pedro Lenz, 49, Mundart-Schriftsteller und Publizist, schreibt in seiner Mundart-Kolumne für die «Schweizer Illustrierte» über die alten Musik-Platten und ihre Gemeinsamkeit mit Städten.

Der jünger Teil vor Läserschaft weiss das möglecherwiis gar nümme: Im Zitauter vo de Vinyl-Singeli hets immer en A-Site und e B-Site ggä. D Rock- und Pop-Bänds hei auben uf der A-Site das Lied veröffetlecht, wo ne Hit hätt söue wärde. Uf der B-Site isch de eifach irgend e Song gsi, wo normalerwiis fasch niemer het interessiert. Aber äbe, me het haut öppis müesse druf tue. Mängisch isch der Song uf der B-Site würklech schlächter gsi aus dä uf der A-Site. Es het auerdings ou chönne vorcho, dass dä Song uf der B-Site zwar weniger iigängig isch gsi, aber derfür meh Spöiz oder meh Zunder het gha.

Gkouft het me di Singeli sinerzit vor auem wägem Hit, auso wäge der ASite. Deheimen uf em Plattespieler het men immer wieder d A-Siten abglo. Es wär eim chuum einisch i Sinn cho, es Singeli z cheeren und d B-Site z lose. Bi de Wurlitzermaschine, wo i vüune Beize si gstange, isch es genau gliich gsi. Me het e Franken oder zwöi i Schlitz abe glo und de luter Lieder drückt, wo me scho het gkennt. Der Arm isch usgfahre, het di gwäuhti Schiben useglüpft, het das Singeli schön uf e Plattetäuer gleit, d A-Site gäg obe, d Nodle isch druf und scho hei au zäme gwüsst, was gspüut wird.

Wie früecher bi de Singeli si ou bi de Städt meischtens nid beidi Site glich bekannt und gliich beliebt.


Mängisch wotts eim dünke, einzelni Städt heigen ou en A-Siten und e B-Site. Nume seit me däm bi de Städt nid eso. Wenns um ne Stadt geit, redt me ender öppe vor Oberstadt und vor Ungerstadt oder vor Autstadt und vor Neustadt. Bi einzelne Städt gits ou e Sunnesite und e Schattesite oder e linggi und e rächti Flusssite.

Wi früecher bi de Singeli si ou bi de Städt meischtens nid beidi Site glich bekannt und gliich beliebt. Und wi bi de Singeli muess das no lang nid heisse, dass d A-Siten unbedingt besser isch.

Lüt, wo ne Stadt churz gö go bsueche, luege de meischtens nume die Stadtsiten aa, wo men us der Wärbig gkennt oder vo de Poschtcharte. Dört si jo meischtens ou d Hotel, d Iichoufszone, d Musee und aui angere Sehenswürdigkeite.

Und gliich chas vorcho, dass me sech aus Tourischt i re frömde Stadt verlouft und de unverhofft i däm Quartier landet, wo normalerwiis nume di Iiheimische verchehre. Es spüut ke Roue, ob das z Outen oder z Buenos Aires oder z Basu oder z Lausanne oder süsch nöime passiert. I somne Fau isch es eifach nume wichtig, dass men a di klassische Singeli zrügg dänkt. Ou bi de Singeli isch es immer wieder vorcho, dass d B-Siten überraschend guet oder sogar no besser aus d A-Siten isch gsi, ou wenns di meischte nid hei gmerkt. Aber für das z verstoh, sött men äben immer beidi Site genau gliich ärnscht näh, sigs bim Musiglose, sigs bim Reisen oder sigs bi irgendöppisem im Läbe.

Im Dossier: Alle «Notabene»-Kolumnen

Auch interessant