Pedro Lenz' «Gschichte vo hie und hütt» No chli meh vom Gliiche

Pedro Lenz, 52, Schriftsteller und Publizist, sinniert in seiner Mundart-Kolumne für die «Schweizer Illustrierte» über die Gewohnheit immer mehr vom Gleichen zu nehmen.

Einisch z Amerika, ire chliine Stadt z Indiana, bin i Znacht chli dür d Gasse zoge. Ire Bar hets no Liecht gha, auso bini ine. Eine vo de Gescht näbe mir ar Bar het scho nes aukoholisches Höch gha. Das het me do dranne gmerkt, dass er di längschti Zit nume no mit sich säuber het gredt. Irgendeinisch het er sis lääre Glas glüpft und de het er zum Barkeeper gseit: «A little more of the same, please.» Was übersetzt öppe heisst: «No chli meh vom Gliiche, bissoguet.»

Won i denn uf e Heiwäg bi, hei di Wort wit hingen i mim Chopf no lang nochedräjt. «No chli meh vom Gliiche», das isch ds Motto vo dene, wo sech nüt Nöis wei überlegge. Immer eifach no chli meh vom Gliiche, ou wenns eim scho lang nümm guet tuet.

Näh mer einisch aa, öpper göng zum ne Dokter und jammeri über Schmärze. Und näh mer ussertdäm aa, di Schmärze sige trotz de Tablettli vom Dokter nid wägg ggange. De cha der Dokter zwöi Sache mache. Är cha sech e nöii Therapie überlegge. Oder är cha no chli meh vo de gliiche Tablettli verschriibe. Der zwöit Wäg dörfti auerdings nid sehr hüufrich si, wöu jo es Mittu wo nüt nützt, normalerwiis i grössere Mängine gäng no nüt nützt.

E Füum macht gross Kasse? Sofort wird Teil zwöi dräjt

Z Amerika isch d Gwohnheit, no chli meh vom Gliiche z näh, zimlech wit verbreitet. Me cha dört i ganz verschidene Läbenslage meh vom Gliiche ha. Wenn z Amerika zum Bischpüu e Pizza guet bschtöut wird, de macht me di gliichi Pizza eifach noch chli grösser. Däm seit me nächär King-Size und aui si zfride. Wenn der Doppu-Hamburger e Verchoufsschlager isch, erfinge si z Amerika der drüfach Hamburger. Und genau eso mache sis ir Füum-Induschtrie: E Füum macht gross Kasse? Sofort wird Teil zwöi dräjt oder wenns guet räntiert, ou no Teil drü und vier. Eifach immer no chli meh vom Gliiche, wöus grad so gäbig geit.

Drum darfs eim nächär ou nid z fescht verwungere, wenn sech d Lüt z Amerika nach jedere bluetige Tragödie no meh und no besser bewaffne.

Es git en Amoklouf are Schueu? D Wäut isch entsetzt. D Experte versueche z verstoh, wi so öppis Furchtbars het chönne passiere. Me cha no gar nid fasse, was eigetlech genau abgloufen isch. D Opfer si vilecht no nid emou beärdiget. Aber d Waffeverchöif im ganze Land zieh scho aa.

Ganz vüu Lüt z Amerika si überzügt dervo, dass ihri Schuele sicherer wäre, wenn me Lehrer und Schüeler würd bewaffne. Si dänke, di beschti Medizin gäge ds Erschossewärde, sig i jedem Fau säuber schiesse. D Logik, wo derhinger steit, isch relativ simpu: Wenn du e Waffe hesch, luegen ig, dass i ou eini ha, aber eini, wo grösser isch aus dini. Und wenn du nächär zwöi Waffe hesch, bsorgen i mir drü. Immer eifach no chli meh vom Gliiche, fasch so wi dä Maa, wo denn ar Bar näbe mir isch gstange.

Im Dossier: Weitere Mundart-Beiträge von Pedro Lenz

Auch interessant