«Gschichte vo hie und hütt» mit Pedro Lenz «Ds Mittumeer und mir»

Pedro Lenz, 52, Mundart-Schriftsteller und Publizist, schreibt in seiner Kolumne für die «Schweizer Illustrierte» über die Bedeutung des Mittelmeeres und warum eine Grenze keinen Sinn macht.

Zwüsche Europa und Afrika isch ds Mittumeer. Das isch natürlech nüt Nöis, wöu ds Mittumeer, das isch scho lang dörte, jedefaus länger aus d Nationaustaate. Ds Mittumeer hets scho ggä, bevor, dass es e Schengen-Ussegränze het ggä.

Und vüu vo däm, wo mer hütt ganz säubschtverständlech aus öppis Eigets aaluege, aus öppis, wo üs ghört, wo zu üs ghört und wo üsen Autag und üsi Identität usmacht, isch irgendeinisch über ds Mittumeer uf Europa cho. D Augebra zum Bischpüu oder ds Chrischtetum oder der Zucker oder der Riis, wo im 10. Johrhundert vo den Araber z Spanien isch iigfüert worde. Ohni z Mittumeer gubs ke Paella und ke Risotto.

D Demokratie isch über ds Mittumeer cho

Ou berüehmti Persönlechkeite si über ds Mittumeer zu üs cho. Der französisch Schriftstöuer Albert Camus isch z Algerien ufgwachse. Der Fuessballstar Zinedine Zidane het algerischi Öutere. Und d Schouspilere Claudia Cardinale isch z Tunesien uf d Wäut cho, aus Tochter vo Italiäner, wo wäge der Armuet uf Nordafrika hei müessen uswandere.

Sogar d Idee vor Demokratie isch über ds Mittumeer zu üs cho, und zwar vo Griecheland uf Italie und de vo dört us immer witer uf Europa ine.

Zue isch zue

Mir isch das aues numen i Sinn cho, wöus jo jetz immer meh Lüt git, wo behoupte, me sött mou d Ussegränze zuemache. Me müess Europa gäge z Mittumeer abrigle. Bis vor öppe 30 Johr hei vor auem d Unrächtsstaate no söttig radikali Lösige verträtte. Denn sis no die gsi, wo gseit hei, me müess sech iigschpliesse. D Unrächtsstaate wi d DDR oder d Sowjetunion hei d Gränze dichtgmacht, dass ne ds Vouk nid cha dervoloufe.

Ungerdesse möchte vüu vo üs d Ussegränze zuemache, dass keni Mönsche meh derzueloufe. Aber wenn me sech iigschpliesst, isch me dinn. De spüuts ke Roue, ob me sech het iigschplosse zum niemer uselo, oder ob me sech het iigschplosse zum niemer inelo. Zue isch zue.

Am Mittumeer hei mer aues z verdanke

Me luegt a ds Mittumeer und dänkt a di Mönsche, wo vo dört zu üs wei cho. Derbi isch ds Mittumeer nid numen e Route, wo Flüchtlinge bruuche, wenn si i Schluchboot es bessers Läbe suechen und für das sogar bereit si, ihres eigete Läben uf ds Spüu z setze. Ds Mittumeer isch vüu meh aus das. Am Mittumeer hei mer meh oder weniger aues z verdanke, wo üsi Kultur und üsi Wärten usmacht. Ohni aui Iiflüss, wo über ds Mittumeer zu üs si cho, wäre mer hütt vilecht no Höhlebewohner.

Wär scho säuber am Mittumeer isch gsi, weiss es: Ds Mittumeer het mängisch Wäuegang. Und wi d Wäue, wo sech i verschideni Richtige bewege, hei sech ou di kulturellen Iiflüss und d Wareflüss sit mängem Johrhundert hin und här bewegt.

Es wär komisch z säge, mir wöue di eigete Wärte verteidige, wenn mer gliichzitig der Ruum ablehne, wo nis di meischte vo dene Wärte het brocht.

 

Im Dossier: Weitere Kolumnen von Pedro Lenz

Auch interessant