«Gschichte vo hie und hütt» mit Pedro Lenz «Ds Gägetöu vo guet»

Pedro Lenz, 51, Mundart-Schriftsteller und Publizist, schreibt über den deutschen Touristen, der auf der Insel La Palma nach der Notdurft ein Zündhölzli anzündete, um das WC-Papier zu verbrennen, und damit einn verheerenden Waldbrand auslöste. Er hat es doch nur gut gemeint...

Es git doch di Redensart, wo seit, guet gmeint sig ds Gägetöu vo guet. Bis vor nes paar Tag han i der Iidruck gha, das sig e soublöde Spruch. Worum söu ächt guet gmeint ds Gägetöu vo guet si, han i mi gfrogt. Am Aafang vor e guete Tat steit doch meischtens e gueti Absicht. Was de süsch? Und wenn me dene, wo öppis guet meinen ungerstöut, si mieche ds Gägetöu, de isch doch das nume negativs Glafer.

Aber jetz rede si z Spanien i de Nachrichte sit Tage vom ne wahnsinnig gfährleche Waudbrand uf der Kanarischen Insle La Palma. Wäge däm Waudbrand si scho Tusigi vo Mönsche us ihrne Dörfer evakuiert worde. Ussertdäm isch e Füürwehrmaa i de Flammen ums Läbe cho. Und wenn me nächär erfahrt, wies zu deren ungloubleche Brandkatastrophen isch cho, de chunnt eim de gliich wieder dä blöd Spruch i Sinn, auso dä, wo seit, guet gmeint sig ds Gägetöu vo guet.

Zu däm Waudbrand isch es nämlech cho, wöu e 27-jährige Tourischt us Dütschland öppis guet gmeint het gha. Dä Tourischt, e sportleche Bursch mit ere blonde Bob-Marley-Frisur, het bire Wanderig im Waud uf ds WC müesse. Aber i däm Waud hets kes WC gha, auso het er sis Gschäft im ne Busch verrichtet. Won er fertig isch gsi, het er sech überleit, dass er ds bruuchte WC-Papier nid eifach so cha lo lige. Auso het ers aazündet. Bis dört häre isch aues guet gmeint gsi.

Wöu aber dä Tourischt us Dütschland isch cho, het er wahrschiinlech der Mani Matter und däm sis Lied vom Zündhöuzli nid gkennt. Süsch hätt er nämlech chönne wüsse, was es einzigs Zündhöuzli für ne Katastrophe cha uslöse. Ds brönnende WC-Papier het ds trochne Gebüsch aazündet. Vom Gebüsch si d Flammen uf einzelni Böim wiiterggange. D Luft het ds Füür immer wiitertreit, und ungerdesse si über 4000 Hektare Waud abebrönnt.

Zu däm Waldbrand isch es cho, wöu e Tourischt us Dütschland öppis guet gemeint het gha

No am sächste Tag nachdäm dass dä jung Maa das WC-Papier het aazündet, si über 350 Füürwehrmannen und 11 Löschflugzüg im Iisatz. Wöus uf der Insle scho lang nümm het gräggntet und wöu der Wind immer wieder sini Richtig änderet, isch es fasch unmöglech, das Füür unger Kontroue z bringe. Ds Füür vo La Palma sig der schlimscht Waudbrand uf spanischem Territorium sit meh weder zäh Johr, säge si im Radio.

Der Maa, wos guet gmeint het, het sech säuber bi der Polizei gmäudet. Er heig genau erklärt, wis passiert sig, und heig betont, er heigs nid äxtra gmacht. Jetz hocket er sit Tagen i Ungersuechigshaft. Im Fernseh zeige si immer wieder, win er abgfüehrt isch worde. Di Büuder vo däm Maa mit sire Bob-Marley-Frisur, d Häng i Handschäue u der Blick gäge Bode grichtet, si fasch so truurig, wi d Büuder vom Füür, wo immer wiiter und no wiiter geit.

Der Mani Matter hätt ne chönne warne, aber äbe, der Tourischt isch meh uf e Bob Marley gstange.

Im Dossier: Weitere Geschichten von Pedro Lenz und «Notabene»-Kolumnen

 
Auch interessant