«Gschichte vo hie und hütt» mit Pedro Lenz Ds Gheimnis vom Schoggichueche

Pedro Lenz, 51, Mundart-Schriftsteller und Publizist, erinnert sich in seiner Kolumne für die «Schweizer Illustrierte» an Frau Häfligers Schoggikuchen - und erklärt, warum es ihn nicht mehr gibt.

Mängisch versteit me d Sachen erscht, wenn öppis passiert. Oder angers gseit, mängisch muess me d Zämehäng vo gwüssne Ereignis lehre kenne, zum wüsse, wieso dass d Wäut eso isch, wi si isch und nid angers. I meine jetz zum Bischpüu das mit em Schoggichueche vor Frou Häfliger. D Frou Häfliger het jo gäng dä wunderbar Schoggichueche gmacht. Aui Lüt ir Nochberschaft hei dä Schoggichueche gkennt. Und i kenne niemer, wo ne nid grüehmt hätt. Der Schoggichueche vor Frou Häfliger isch wit und breit der bescht gsi, ohni Diskussion. Aber sit im letschte Früehlig ihre Maa isch gstorbe, isch es verbi, mit däm wunderbare Schoggichueche.

Vüu wüsse möglecherwiis das gar nid, aber der Maa vor Frou Häfliger, der Fredi, das isch e grosse Sammler vo Kafirahmdecheli gsi. Är het ou angers Züg gsammlet, aber das mit de Kafirahmdecheli isch eidüttig sini grossi Liideschaft gsi. Der Fredi het ungloublech vüu kompletti Kafirahmdecheli-Serie gha. D Asterix-Figure, d Kapubrügg vo Luzärn i drissg Asichte, d Anker-Motiv, d Meerestier, d Gsichter vor Wäut, d Schwizer Trachte, d Hunderasse und so witer. Jedes Mou, wenn er ghört oder gläse het, es sig e nöii Serie usecho, isch der Fredi i ds Cash & Carry und het e Chischte vou dere Kafirahmportione gchouft.

Sit ihre Maa isch gstorbe, isch es verbi mit däm wunderbare Schoggichueche



Aber wöu bi Häfligers deheime niemer Kafirahm i ds Kafi het to, het der Fredi aube der ganz Rahm ines Chesseli gschüttet. He jo, was hätt er süsch söue mache? Är isch jo nume a de Decheli interessiert gsi. Die het er sorgfäutig putzt und sortiert. Je nachdäm, wivüu nöii Kafirahmportione dass er gchouft het gha, si de do a eim einzige Nomittag guet und gärn drü oder vier Liter Kafirahm zämecho. De het sini Frou dä Kafirahm bruucht zum Schoggichueche-Bache.

Aber äbe, sit der Fredi dä Härzinfarkt het gha, i de Ferie z Tenero, isch fertig. Der Fredi hets nid überläbt. Und jetz sammlet bi Häfligers niemer meh Kafirahmdecheli, auso gits ou ke Kafirahmresärve meh, und drum het d Frou Häfliger ufghört, Schoggichueche bache.

Si het mer eis Mou verzöut, si heig eigetlech gar nie bsungers gärn bbache. Si heig di viele Schoggichüeche nume gmacht, wöus se gröit heig, am Fredi si Kafirahm furtzschütte. Und sit der Fredi sig gstorbe, göng si lieber chli uf Reise, aus der ganz Tag ir Chuchi z stoh.

Der Sohn versuecht jetz, am Fredi sini Kafirahmdecheli-Sammlig uf Ricardo z verchoufe. Es sig drum leider ir Verwandtschaft niemer ume, wo interessiert sig a dere wunderbare Sammlig. Und d Grossching sammli nid emou Panini-Büudeli. Ussertdäm sige si wahrschiinlech sowiso no z chliin, zum chönne verstoh, wi di Sammlerei vom Grossvatter mit em Schoggichueche vor Grossmueter zämeghanget sig.
 

Im Dossier: Weitere Geschichten von Pedro Lenz und «Notabene»-Kolumnen

Auch interessant