«Gschichte vo hie und hütt» mit Pedro Lenz «Hass, Hass, Hass, Hass»

Pedro Lenz, 50, Mundart-Schriftsteller und Publizist, macht sich in seiner Mundart-Kolumne für die «Schweizer Illustrierte» Gedanken über den Hass gegen allen und jeden.

Möglecherwiis hets scho immer Hass uf einzelni Mönschegruppe ggä, do bi üs und überau uf der Wäut. Vereifachige, Pouschalverurteilige, Vorurteil, Frömdehass, Mönschehass, Hass gäge Verfougti, Hass gäge Rächtlosi, Hass gäge Ungerdrückti, Hass gäge Verdingching und gäge Fahrendi. Hass gäge Lüt, wo vo Chrieg und vo Eländ betroffe si, Hass gäge Armi und Chranki, Häss gäge Mönsche, wo ertrinke, wo verhungere, wo erfrüüre, wo vertribe si worde, das aues het me wahrschiinlech scho immer und überau gkennt.

Es het vilecht ou scho immer Säubschtgrächtigkeit ggä, Unmönschlechkeit, Ablehnig vo auem, wo me nid säuber kennt und nid säuber versteit, Hass gägen aues, wo eim Angscht macht. Ou das isch vermuetlech nid ganz neu.

Was aber nöi isch, isch die augemeini Gnadelosigkeit, ds gränzelose Usmass vo däm Hass, d Verbreitig vo däm Hass i de soziale Medie, i de Läserbriefe, i de Zitige, d Normalität vo däm Hass, vo däm Hass gägen aues und jede, wo kes Dach über em Chopf het, Hass gägen aui, wo kes Asyu hei und es Asyu sueche. Hass gägen aui, wo nid di gliichi Religion hei, Hass gäge d Mönscherächt und Hass gäge Rächtstaat. Das isch hie aues ziemlech nöi.

Und nöi isch ussertdäm, dass der Hass i letschter Zit no witer geit. Immer meh vo dene wo hasse, hasse nümm nume die Ärmschte und di Elände. Si hasse nümm nume die, wo vor em Tod flüchte. Nei, der Hass preicht jetz gäng meh ou no die, wo nid bereit si, äbefaus z hasse. Die wo nid bereit si, aui Gränze z verbarrikadiere. Der Hass preicht jetz ou die, wo nid bereit si, d Ouge vor em Eländ abzwände. Der Hass preicht jetz ou die, wo trotz aune Problem no a Dialog gloube.

Isch de der barmhärzig Samariter ou e Trottu gsi?

Die, wo nid wei mitmache bi däm augemeine Hass, wärde zur Ziiuschiibe vo däm nöie Hass. Me seit ne Guetmönsche und meint mit guet öppis Negativs. Guet si isch jetz schlächt. Mönschlechkeit isch jetz hassenswärt.

Si rede vor Verteidigung vo de weschtleche Wärte, aber der einzig Wärt, wo me gägewärtig vone ghört, isch zuemache, abschotte, abschiebe, usschaffe, abwise und witerhasse.

Söue doch di angere versuuffe und verrotte. Söue doch di angere verhungere und bombardiert wärde. Mir gsehs und ghöres, aber es interessiert offebar fasch niemer meh. Und die, wos no interessiert, die, wo bi däm augemeine Kollektivhass nid möchte mithasse, die wärde verspottet und lächerlech gmacht und ghasset. Die, wo no a Mönschlechkeit gloube, si politisch korräkti, linggi und nätti Trottle.

Isch de der barmhärzig Samariter ou e Trottu gsi? Und dä vo Nazareth, wo vo de Pharisäer so ghasset isch worde, wöu er di Lahme het gmacht z loufe und di Blinge het gmacht z luege? Isch ou är nume no e nätte Trottu? Isch ou är numen e naive Guetmönsch?

Im Dossier: Weitere Geschichten von Pedro Lenz und «Notabene»-Kolumnen

Auch interessant