Pedro Lenz' «Gschichte vo hie und hütt» «Regionaus Handwärch»

Pedro Lenz, 53, Schriftsteller und Publizist, sinniert in seiner Mundart-Kolumne für die «Schweizer Illustrierte» über selbstgemachte Wolljacken aus Argentinien. 

Ir hüttige Zit i dere globalisierte Wäut, wo mer drinn läbe, wird fasch aus gäng ähnlecher. Ir Innestadt vo Aarou hets di gliiche Kafi wi ir Innestadt vo London, und z Madrid fingt me di gliiche Turnschueläde wi z Spreitebach. Drum han i mi denn, won i z Buenos Aires amne Festival bi gsi, so fescht uf e Märit vo San Telmo gfröit. Der Märit vo San Telmo sig jede Sunntig, hei mer di Iiheimische gseit.

Regionaus Handwärch wod äneluegsch 

Dä Märit i däm bekannte Stadtteil vo Buenos Aires, dä sig riisig und einzigartig, isch ou i de verschidene Reisefüerer gstange. Das isch ömu sicher öppis, wo nid überau uf der Wäut fingsch, han i mer säuber gseit, won i am Sunntig häre bi. Und tatsächlech isch mer dä Märit einmalig vorcho. Wo me häregluegt het, hei si regionaus Handwärch usgleit, Läderware, Schmuck, Strickware und so witer. 

Amne Stang si nes paar Froue am Lisme gsi. Uf der Uslag hei si wunderschöni Wulejäggli gha mit sehr originelle Verzierige. I ha de chli mit dene Froue gredt, si hei mer verzöut, us welere Region dass si chöme, us Patagonie, ere Gägend im Süde vo Argentinie, wos chaut isch und wo wenig Nutzpflanze wachse. Vüu Lüt i dere Gägend läbi vor Schofzucht, und entsprächend heigs ou Spinnereie und chliini Handwärchsbetriibe, wo sech uf d Verarbeitig vo Wule spezialisiert heige. 

Troumhafts Wulejäggli 

Vüu vo dene glismete Produkt wärdi i Heimarbeit gmacht und nächär i de grosse Städt im Land a Märite verchouft, so wi äbe do bi ihne. I ha dört es wunderschöns und originells Wulejäggli gchouft. Und so win i gwüsst ha, dass es deheim ir Schwiz no Summer isch, han i natürlech ou gwüsst, dass der nöchscht Winter einisch chunnt und dass i de sicher froh bi um so ne herrlechi, vüufarbigi, einmaligi, handglismeti und typisch argentinischi Wulejagge. 

I ha nächär a däm Märit i däm San-Telmo-Quartier vo Buenos Aires no nes paar Gschänkli gchouft, nüt Grosses, eifach luter Züüg, wos z Europa sicher nid git. Aber am meischte Fröid han i a däm Wulejäggli us der Gägend vo Patagonie gha. Won i wider ir Schwiz bi gsi, han i z Bärn öppis z tüe gha. De bin i dört über e Märit gschländeret, ha chli das und dises aagluegt, und de gsehn i ds hoorgenau gliiche Jäggli, win i uf em Märit vo Buenos Aires gchouft ha gha. 

Ds gliiche Jäggli gehts o z'Bärn 

Es isch nid ähnlech oder sehr ähnlech gsi, nei, es isch eis zu eis ds gliiche Jäggli gsi! Di genau gliiche Muschter, di genau gliiche Ufsätz, di genau gliiche Zötteli. Zersch han i gmeint, di Lüt vo däm Märitstang heige Beziehige zu Argentinie. Aber nächär han i usegfunge, dass das Massewar isch, wo irgendwo z Asie induschtriell produziert wird und wo men uf aune Märite vor Wäut cha choufeDass i das usegfunge ha, het mer grad d Fröid gno, d Fröid am Märit vo San Telmo, d Fröid a mim Wulejäggli und d Fröid ar patagonische Schofzucht. 

Mehr Kolumnen von Pedro Lenz finden Sie hier.

Auch interessant